МЗС Беларусі пакінулі яшчэ два супрацоўнікі
- 22.09.2020, 12:46
Працы пазбавяцца дыпламаты, якія на сёння працуюць у Латвіі, Польшчы, Бэльгіі.
Сайт nn.by даведаўся прозвішчы двух чалавек, якія пакінулі МЗС. Гаворка пра работнікаў цэнтральнага апарату ведамства - Паўле Караткевіча і Андрэя Трусава.
Караткевіч быў другім сакратаром дэпартамента знешнеэканамічнай дзейнасці. У гутарцы з карэспандэнтам Караткевіч пацвердзіў, што з 18 верасня не з'яўляецца супрацоўнікам МЗС, але падрабязнасці звальнення надумаў не агучваць.
Таксама працы пазбавіўся Андрэй Трусаў - другі сакратар Галоўнай управы Азіі і Афрыкі. Трусаў быў адзіным супрацоўнікам МЗС, які валодаў інданезійскай мовай.
І Караткевіч, і Трусаў - выпускнікі расейскага МДІМД, дзе навучаліся па квоце ад беларускага МЗС. Яшчэ раней быў звольнены Андрэй Місюра, трэці сакратар амбасады Беларусі ў Індыі.
Са звестак cайта, працы пазбавяцца дыпламаты, якія на сёння працуюць у Латвіі, Польшчы, Бэльгіі. Многіх выклікаюць да 28 верасня ў распараджэнне МЗС.