Ягор Мешчаракоў: Мы ўжо прайшлі пункт незвароту, нацыя стала другой за гэтыя дні жніўня

• 2.09.2020, 18:08

Экс-баскетбаліст нацыянальнай каманды Беларусі звярнуўся да спартоўцаў.

Экс-баскетбаліст нацыянальнай каманды Беларусі, намеснік старшыні Беларускай федэрацыі баскетбола Ягор Мешчаракоў мяркуе, што краіна прайшла пункт незвароту, паведамляе «Трибуна».

«Мяне клічуць Ягор Мешчаракоў. Я - майстар спорту, чэмпіён Рэспублікі Беларусь, Чэмпіён Украіны, віцэ-чэмпіён Расеі, гулец нацыянальнай каманды Беларусі 1995-2012. Баскетбольная грамадскасць 5 разоў прызнавала мяне найлепшым гульцом Беларусі. На мне форма нацыянальнай каманды, якой я прысвяціў 20 гадоў свайго жыцця.

Дарагія мае спартоўцы! Усе тыя, хто ўсё жыццё з гонарам і годнасцю прадстаўляў і прадстаўляе нашу Беларусь на ўнутранай і міжнароднай арэне. Час прыйшоў паказаць, што нас гэтай годнасці не пазбавілі, што ў нас ёсць гонар і мы з народам. Мы - частка гэтага народа!

Мы ніколі не забудзем той гвалт, які ўчынілі на вуліцах нашых гарадоў. Мы ніколі не забудзем тыя крыкі болю, якія даносіліся з месцаў зняволення. Сёння не можа быць палавінчатай пазіцыі. Мы ўжо прайшлі пункт незвароту, нацыя стала другой за гэтыя дні жніўня 2020 года.

У многіх з нас сэрца баліць за радзіму. Але я бачу, што беларусы адрадзіліся. Проста паглядзіце на шчырыя і шчаслівыя вочы нашых людзей. Шмат каму няпроста выказаць сваю пазіцыю - прысутнічае страх. Але страх - гэта ілюзія.

Мы - Вольнае аб'яднанне спартоўцаў Беларусі. Далучайся! Жыве Беларусь», - сказаў Мешчаракоў.