Майк Пампэа падзякаваў Лінасу Лінкявічусу за пазіцыю Літвы аб Беларусі

• 17.09.2020, 11:37

Падчас перамоў дзяржсакратар ЗША і кіраўнік МЗС Літвы закранулі тэму бяспекі ў рэгіёне.

Дзяржсакратар ЗША Майк Пампэа сустрэўся ў Вашынгтоне з міністрам замежных спраў Літвы Лінасам Лінкявічусам, каб абмеркаваць пытанні рэгіянальнай бяспекі і двухбаковага супрацоўніцтва, паведаміў Дзярждэпартамэнт, паведамляе «Голас Амерыкі».

У паведамленні гаворыцца, што Пампэа і Лінкявічус адкрылі сустрэчу падпісаннем мемарандума аб узаемапаразуменні ў пытаннях бяспекі сетак 5G, пасля чаго абмеркавалі далейшыя крокі ліквідацыі ўразлівасцяў у сетках сувязі, якія тычацца нацыянальнай бяспекі.

Яны таксама абмеркавалі сітуацыю ў Беларусі, ахопленай масавымі пратэстамі супраць Лукашэнкі.

«Дзяржсакратар выказаў удзячнасць Літве за яе лідарства ў абароне незалежнасці і тэрытарыяльнай цэласнасці Беларусі, а таксама дэмакратычных правоў яе народа», - заявіла прадстаўніца Дзярждэпартамента Морган Артагус.

«Дзяржсакратар Пампэа падзякаваў Літве за тое, што яна выконвае абавязанні ў дачыненні да NАТО, у тым ліку выдаткоўвае 2 адсоткі ВУП на абарону і робіць унёсак у міжнародныя намаганні для гарантавання бяспекі ў Афганістане, Іраку і Армузскай затоцы, - працягнула яна. - Дзяржсакратар зноў падзякаваў Літве за забарону «Хэзбалы» як тэрарыстычнай арганізацыі».