У Нідэрландах будуць плаціць за здадзеную тару кожнага памеру

• 4.08.2020, 15:28

У краіне паставілі мэту, каб да 90% бутэлек і бляшанак адпраўлялася на перапрацоўку.

З 1 ліпеня 2021 года ў Нідэрландах з'явяцца пункты прыёму маленькіх пластыкавых бутэлек (аб'ёмам да 1 літра). За кожную здадзеную бутэльку можна будзе атрымаць да 15 еўрацэнтаў, піша «Европульс».

У міністэрстве навакольнага асяроддзя Нідэрландаў спадзяюцца, што дзякуючы гэтаму да 90% усіх пластыкавых бутэлек у краіне будзе перапрацоўвацца.

У Нідэрландах з 2014 года працуе сістэма фандаматаў - аўтаматаў для прыёму тары, якія вяртаюць яе кошт. Аднак пакуль што яны прымаюць толькі бутэлькі аб'ёмам, большым за літр.

Пасля ўвядзення сістэмы вяртання кошту тары ў Нідэрландах стала перапрацоўвацца больш бутэлек, але ўсё адно амаль 20% трапляюць на звалкі (у асноўным гэта менавіта маленькія бутэлькі).

Калі схема са здачай маленькіх бутэлек выявіцца эфектыўнай, у 2022 годзе ў Нідэрландах з'явяцца падобныя аўтаматы для прыёму алюмініевых бляшанак. Такія аўтаматы будуць знаходзіцца на чыгуначных станцыях і запраўках.