Выбары ў Польшчы: Шанцы Дуды і Тшаскоўскага на перамогу - прыблізна роўныя

• 8.07.2020, 21:28

Апублікаваныя звесткі апытання.

Шанцы кандыдатаў у прэзідэнты Польшчы Анджэя Дуды і Рафала Тшаскоўскага на перамогу ў другім туры прэзідэнцкіх выбараў - прыблізна роўныя. Пра гэта сведчыць апытанне Інстытута рынкавых і грамадскіх даследаванняў (IBRiS), праведзены на замову штотыднёвіка Polityka, паведамляе «Радио Польша».

Паводле звестак даследавання, прыход у другім туры галасавання можа быць нават вышэйшым, чым у першым - 65,4% (супраць 64,51%). Так 58,5% рэспандэнтаў заявілі, што «дакладна» пойдуць галасаваць, яшчэ 6,9% заявілі, што «верагодна» прагаласуюць.

Цяпер ні Аб'яднаныя правыя сілы, ні «Грамадзянская кааліцыя» не могуць быць упэўненыя ў перамозе свайго кандыдата. Апытанне паказала, што за дзейнага прэзідэнта Анджэя Дуду гатовыя прагаласаваць 48,7%, за Рафала Тшаскоўскага - 47,8%, тады як 3,5% яшчэ не вызначыліся. З розніцай у 0,9 працэнтных пунктаў і з улікам статыстычнай памылкі, канчатковы вынік выбараў практычна немагчыма прадказаць.

Каб умацаваць свае шанцы на перамогу, у кандыдатаў застаецца час да паўночы 10 ліпеня, пасля чаго пачнецца перадвыбарчая цішыня, якая працягнецца да 9-й вечара дня галасавання, гэта значыць нядзелі, 12 ліпеня.

У даследаванні Інстытута рынкавых і грамадскіх даследаванняў, якое было праведзенае 4 ліпеня, узялі ўдзел 1100 палякаў з правам голасу. Апытанне праводзілася з выкарыстаннем кампутарнай сістэмы тэлефоннага апытання (CATI).