У Кеніі пачалася раздача 4G-інтэрнэту з дапамогай паветраных шароў

• 8.07.2020, 19:16

Тэхналогію пратэставалі на 35 тысячах карыстальнікаў.

Кампанія Loon холдынгу Alphabet запусціла ў Кеніі стратастаты для раздачы 4G-інтэрнэту. Як паведамляе ВВС, праект анансавалі яшчэ два гады таму, але дазвол ад уладаў краіны быў атрыманы толькі цяпер.

Тэхналогію ўжо пратэставалі на 35 тысячах карыстальнікаў. Сетка стратастатаў ахопіць плошчу блізу 50 тысяч квадратных кіламетраў.

Адзначаецца, што на вышыні блізу 20 кіламетраў над Кеніяй будуць пастаянна прысутнічаць 35 паветраных шароў з сонечнымі панэлямі. Іх запускаюць з тэрыторыі ЗША і перамяшчаюць па стратасферных вятрах.

У чэрвені хуткасць «сыходнага» патоку звестак склала 18,9 Мбіт/с, «узыходнага» - 4,74 Мбіт/с, затрымка - 19 мілісекунд. Таксама былі правераныя такія функцыі і сэрвісы, як WhatsApp, галасавыя і відэазванкі, прагляд вэб-старонак, ролікі на YouTube, электронная пошта.

У Loon прызнаюцца, што пандэмія каранавіруса прымусіла кампанію працаваць над праектам яшчэ хутчэй, бо людзей трэба было забяспечыць доступам да сродкаў сувязі.