Медыкі высветлілі, як раннія шлюбы звязаныя з захапленнем алкаголем

• 4.07.2020, 14:11

Даследаванне правялі ва Універсітэце судружнасці Вірджыніі (ЗША).

Новае даследаванне Універсітэта судружнасці Вірджыніі (ЗША) паказала, што шлюбы, заключаныя ва ўзросце да 21 года, могуць павысіць верагоднасць злоўжывання спіртным, асабліва калі ў аднаго з чальцоў маладой сям'і існуе да гэтага вызначаная генамі схільнасць, піша cursorinfo.co.il.

«Такім чынам, раннія шлюбы не маюць такой ахоўнай выгоды з пункту гледжання паслаблення генетычнай схільнасці, якая назіралася ў шлюбе, заключаным у больш сталым узросце», – пракаментавала вынікі Рэбека Сміт, адна з аўтарак працы.

У ходзе даследавання навукоўцы прааналізавалі звесткі пра стан здароўя і перыядычнасць ужывання алкаголю 937 чалавек ва ўзросце ад 21 да 25 гадоў, частка з якіх была ў шлюбе (узятым як да 21 года, так і пасля). Спецыялісты звярнулі ўвагу, хто часцей і цяжэй злоўжываў спіртным – адзінокія людзі, якія пабраліся шлюбам пасля 21 года або раней за гэты ўзрост.

Паводле словаў Сміт, вынікі здзівілі саміх даследнікаў. Яны чакалі, што шлюб ва ўсіх выпадках хоць бы ў малой ступені адаб'ецца станоўча і падвысіць дабрабыт сужэнцаў, бо мяркуецца, што ён засцерагае ад стрэсаў і звязаных з імі псіхічных і фізічных захворванняў і ва ўсім лепшы за долю халасцякоў. Але чаканні пацвердзіліся толькі ў выпадку даволі позніх шлюбаў (пасля 21 года), і, наадварот, тыя, хто паспяшаўся з жаніцьбай, сутыкаліся з праблемамі з алкаголем, а ў некаторых выпадках і з псіхаактыўнымі рэчывамі нават часцей, чым адзіночкі.

«Традыцыйныя жыццёвыя падзеі, як шлюб і нараджэнне дзяцей, маюць тэндэнцыю адбывацца ў пэўныя перыяды жыцця. Таму калі гэтыя падзеі адбываюцца раней ці пазней, яны могуць не мець спрыяльнага эфекту, які мы ад іх чакаем», – разважае Рэбека Сміт.