Выбух COVID-19 адбыўся ў санстанцыі Уздзенскага раёна

• 3.07.2020, 9:53

Пацвердзіць заражэнне здолелі, толькі зрабіўшы платны аналіз.

Ва Уздзенскім раённым цэнтры гігіены і эпідэміялогіі – выбух каранавірусу. Пра гэта Charter97.org паведаміў адзін з супрацоўнікаў.

"Улады ўвесь час кажуць, што эпідэмія ідзе на спад, але новыя асяродкі з'яўляюцца нават у структуры Міністэрства аховы здароўя, - піша ён. - Ва Уздзенскім раённым цэнтры гігіены і эпідэміялогіі - новы асяродак каранавірусу.

Ёсць пацверджаныя выпадкі інфекцыі. Адзін з супрацоўнікаў быў абвешчаны кантактам першага ўзроўню задоўга да гэтага, але яго не ізалявалі, не адхілялі ад працы, а галоўны лекар не адпускаў у працоўны і нават сацыяльны адпачынак паводле заявы. Работнiк быў вымушаны хадзіць на працу, кантактаваць з калегамі і наведнікамі.

Пацвердзіць інфекцыю здолелі, толькі зрабіўшы платны аналіз!

І гэта ўстанова аховы здароўя, якая павінна працаваць на прафілактыку і ліквідацыю наступстваў, праводзіць эпідэмічныя расследаванні і апрацоўванне".