У Гародні знайшлі «ўмельца», які з зімбабвійскіх даляраў рабіў еўры

• 28.07.2020, 15:28

Яго шукалі некалькі месяцаў.

Жыхар Гародні ў красавіку гэтага года прынёс у абменнік купюру 1000 еўраў. З ягоных слоў, банкнота засталася яму ад бацькі ў спадчыну. Касірка абменніка адразу пазнала, што гэта фальшыўка. Высветлілася, што купюра - гэта грашовы білет Рэзервовага банка Зімбабвэ наміналам 1000 даляраў узору 2007 года. Паводле гэтага факта распачалі крымінальную справу, піша onliner.by.

Экспэрты Дзяржкамітэта судовых экспэртыз Гарадзенскай вобласці ўстанавілі, што фальшываманетчыкі змянілі на білеце найменне банка-эмітэнта і назву валюты, выдаліўшы частка першапачатковых рэквізітаў. Затым на іх месцах зрабілі чытаныя тэксты і некаторыя малюнкі.

«Цягам некалькіх месяцаў аператыўнікі ў барацьбе з эканамічнымі злачынствамі Кастрычніцкага РАУС супольна з калегамі з СК правялі шэраг аператыўна-вышуковых мерапрыемстваў. Выявілася, што некалькі гадоў таму такія фальшыўкі ўжо здаваліся на тэрыторыі нашай краіны. Адпрацаваўшы мноства версій, праваахоўнікі высветлілі асобу мужчыны, які можа мець дачыненне да вырабу падробкі. Цяпер ён адбывае пакаранне ў папраўчай калоніі за ўчыненае раней аналагічнае злачынства», - гаворыцца ў паведамленні.

Высветлілася, што менавіта гэты чалавек зрабіў тыя самыя падробленыя 1000 еўраў. Яго прызналі падазраваным паводле артыкула 221 Крымінальнага кодэкса «Выраб, захоўванне альбо збыт падробленых грошай або каштоўных папер». Санкцыя артыкула прадугледжвае да сямі гадоў пазбаўлення волі.