У Хабараўску пачалося шэсце ў падтрымку арыштаванага губернатара
- 15.07.2020, 17:18
У горадзе пяты дзень прадаўжаюцца вулічныя акцыі.
Жыхары Хабараўска пяты дзень запар выйшлі на шэсце ў падтрымку арыштаванага губернатара Хабараўскага краю Сяргея Фургала. Трансляцыю з месца падзей вядзе рэгіянальны штаб палітыка Аляксея Навальнага, паведамляе «Радыё Свабода».
Дэманстрацыя праходзіць на цэнтральных вуліцах горада, гучаць лозунгі «Сваіх не кідаем» і «Хабараўск мы ратуем». Акцыя не была ўзгодненая з гарадскімі ўладамі, аднак паліцыянты і супрацоўнікі Расгвардыі не ўмешваюцца ў падзеі.
Перад пачаткам шэсця ў цэнтры горада адбыўся мітынг у падтрымку губернатара.
Перад мерапрыемствам урад рэгіёну выступіў з просьбай спыніць акцыі пратэсту праз небяспеку распаўсюджвання каранавіруса.
Фургал быў арыштаваны 10 ліпеня, яго абвінавачваюць у дачыненні да двух забойстваў і замаху на забойства прадпрымальнікаў у сярэдзіне двухтысячных гадоў. Яму пагражае пажыццёвы тэрмін. Ён абвінавачванні адмаўляе.
Першая акцыя ў падтрымку Фургала прайшла ў Хабараўску 11 ліпеня. Яна была самай шматлікай. МУС сцвярджала, што ў ёй узялі ўдзел да 12 тысяч чалавек. Журналісты давалі ацэнку да 40 тысяч удзельнікаў.