Дзмітрый Калдун, каранавірус якога «скасавала» Міністэрства аховы здароўя, адправіўся на самаізаляцыю

• 11.07.2020, 18:54

У сацсетцы спявак расказаў, як сябе цяпер адчувае.

11 ліпеня вядомы артыст Дзмітрый Калдун апублікаваў у Instagram фота з подпісам «Мая першая раніца дома». У подпісе да здымку спявак падзякаваў медыкам 6 гарадской клінічнай лякарні Менска, у якой ён правёў 4 дні, а таксама тым, хто яго падтрымлівае, піша kp.by.

«А што з вамі было?», - пытаюцца ў каментарах пад допісам падпісчыкі.

«Што было, то мінула», - парыруе артыст.

У сябе ў stories Дзмітрый распавёў, што з ім усё нармальна, і ён знаходзіцца на самаізаляцыі.

- Вы, дарэчы, пытаецеся, чаму я павінен знаходзіцца на самаізаляцыі, калі ў мяне не пацвердзілі каранавірусную інфекцыю. Справа ў тым, што я 4 дні праляжаў у аддзяленні з людзьмі, у якіх, магчыма, быў каранавірус, таму я цяпер вымушаны пасядзець дома, - патлумачыў артыст сваё «зняволенне».

Спявак прадэманстраваў сляды ад уколаў, якія нагадваюць яму пра некалькі праведзеных у лякарні дзён, і дадаў:

- Але я сябе адчуваю добра і да мяне найбліжэйшым часам будуць прыходзіць людзі, якія брацьмуць дадатковыя даследаванні, аналізы, заборы, мазкі і сачыць за маім станам. Але я спадзяюся, што ўсё будзе добра, і мы неўзабаве ўбачымся.