Сабор Святой Сафіі ў Стамбуле стаў мячэццю

• 10.07.2020, 20:02

Эрдаган выдаў адмысловы ўказ.

Прэзідэнт Турцыі Рэджэп Таіп Эрдаган выдаў указ, якім афіцыйна надаў Сабору Святой Сафіі ў Стамбуле статус мячэці. Пра гэта паведамляе «Европейская правда» са спасылкай на Hurriyet Daily News.

Эрдаган зрабіў гэта адразу пасля таго, як вышэйшы адміністрацыйны суд Турцыі дазволіў змяніць статус сабора Айя-Сафія, ануляваўшы пастанову 1934 года аб пераўтварэнні сабора ў музей.

Сабор, пабудаваны ў VI стагоддзі пры візантыйскім імператары Юстыніяне I, амаль тысячагоддзе лічыўся найбуйнейшым у свеце хрысціянскім храмам.

Пасля захопу Канстанцінопаля асманамі ў 1453 годзе сабор перарабілі ў мячэць, уладкаваўшы вакол яго чатыры мінарэты. Музеем Айя-Сафія стала ў 1934 годзе на пастанову заснавальніка сучаснай турэцкай дзяржавы Мустафы Кемаля Атацюрка.

З 1985 года сабор уключаны ў спіс Сусветнай спадчыны ЮНЕСКА.

Напярэдадні пастановы суда прэс-сакратар прэзідэнта Турцыі Ібрагім Калін заявіў, што пераўтварэнне сабора ў мячэць не азначае яго закрыцця для турыстаў.

З яго слоў, Турцыя захавае там хрысціянскія абразы. «Усе нашы асноўныя мячэці адкрыты як для наведвальнікаў, так і для вернікаў», - сказаў Калін.