«Сістэма Лукашэнкі рыпіць і развальваецца»

• 1.07.2020, 14:12

Беларус эмацыйна звярнуўся да суайчыннікаў на дзяржаўнай службе.

Чытач даслаў у рэдакцыю Charter97.org ліст, у якім заклікаў суайчыннікаў на дзяржаўнай службе не выконваць злачынныя загады «Сашы 3%»:

«Запомніце, што садыстаў і ідыётаў, якія шчыра вераць у тое, што зло і подласць павінны радавацца, вельмі мала. Астатнія проста баяцца. І гэтым садыстам і ідыётам вельмі важна, каб яны не засталіся адны, каб замазаць брудам як мага больш людзей.

Прашу вас, людзей з сумленнем, не паддавайцеся ім! Не ідзіце на злачынства перад сабой, перад сваімі дзецьмі, перад народам! Не кажыце: калі не я, то хто-небудзь іншы падпіша. Галоўнае, каб вы не падпісалі, не хапалі нявінных, не катавалі іх і не саджалі ў турму. Вам самім будзе моташна глядзець на сябе ў люстэрка!

Мы часта пытаем сябе: а што я магу? Можаш! Калі хаця б адзін чалавек спыніцца і не падпіша, не ўдарыць, не асудзіць, адмовіцца выконваць злачынны загад – гэта будзе вялікая перамога! У Лукашэнкі вельмі мала прыхільнікаў. Уся сістэма трымаецца на страху, хлусні і халуйстве. Няхай яна рыпіць і развальваецца! І гэта дзякуючы ВАМ!»