Пад вінаграднікам у Італіі знойдзеная старажытнарымская мазаіка

• 28.05.2020, 11:56

Знаходку датуюць прыблізна III стагоддзем нашай эры.

Група італійскіх геадэзістаў выявіла старажытнарымскую мазаічную падлогу і падмурак пад вінаграднікам у камуне Неграр Вальпалічэла. Пра гэта распавялі ў Фэйсбуку прадстаўнікі самой камуны, паведамляе часопіс «Нож» са спасылкай на The Guardian.

Добра захаванае пакрыццё сведчыць аб тым, што раней на гэтым месцы знаходзілася старажытнарымская віла - пра гэта здагадаліся яшчэ ў 1922 годзе, калі былі знойдзеныя іншыя аб'екты. Саму знаходку датуюць прыблізна III стагоддзем нашай эры.

Са слоў прадстаўнікоў камуны, геадэзісты плануюць і далей праводзіць раскопкі, ім будуць дапамагаць уладальнікі вінаградніку і прадстаўнікі муніцыпалітэта. Яны спадзяюцца, што ім удасца «падабраць аптымальныя спосабы, каб зрабіць гэты схаваны пад нагамі археалагічны скарб даступным і дасягальным».