У Калінкавічах ужо дзесяць дзён шукаюць хворага з пнеўманіяй, які ўцёк з лякарні
- 28.05.2020, 11:31
63-гадовы вясковец самавольна пакінуў тэрапеўтычнае аддзяленне раённай лякарні.
У Калінкавічах міліцыя шукае мужчыну, які ўцёк з лякарні - у яго пнеўманія, паведамляе МУС.
63-гадовы жыхар вёскі Лясца Мікалай Іванавіч Захаранка раніцай 17 траўня самавольна пакінуў тэрапеўтычнае аддзяленне раённай лякарні, дзе знаходзіўся на лячэнні з дыягназам «пнеўманія».
Ягоныя прыкметы: на выгляд 60-65 гадоў, рост блізу 160-165 см, валасы кароткія сівыя, вусы сівыя.
Быў апрануты: пінжак цёмнага колеру, штаны светла-шэрага колеру, кашуля ў клетку чорна-сіняга колеру, красоўкі цёмнага колеру. Асаблівыя прыкметы: прыкульгвае на левую нагу. Пры сабе меў пакет зялёнага колеру з асабістымі рэчамі.