Менскі выпускнік: Эпідэмія каранавірусу паднесла масу новых нечаканак
- 27.05.2020, 14:47
Учорашні школьнік расказаў пра тры варыянты адказу на пытанне «Што рабіць?».
Для многіх маладых беларусаў, якія цяпер скончылі школы, прыйшоў час пастанаўляць, што рабіць далей. Эпідэмія каранавірусу ўнесла карэктывы ў некаторыя планы, піша тэлеграм-канал «Баста!».
«Мы дачакаліся канца навучальнага года, другая палова якога паднесла масу новых нечаканак, – піша выпускнік 11-га класа адной з менскіх школаў. – Ніхто, спадзяюся, не забыўся пра тое, што ў Беларусі існуе закон пра службу ў войску, які не дае дадатковых адтэрміновак. Многія маладыя людзі не проста спадзяваліся паступіць сёлета, каб не ісці "таптаць кірзу", але спадзяваліся паступіць у іншыя краіны, каб атрымаць якасную адукацыю і як страшны сон забыцца беззаконне ў Беларусі.
Але тут на галаву зваліўся Covid-19, які разбіў усе гэтыя надзеі аб сцяну. Не з'едзеш для паступлення, межы зачыненыя, магчымасці растварыліся.
І застаецца ўсяго некалькі варыянтаў, з якіх няма ніводнага чалавечага.
Пачнем з таго, што ўлады Беларусі не пайшлі насустрач людзям ва ўмове пандэміі і не зрабілі ніякіх палёгак і скідак. Кошт навучання ў ВНУ Беларусі яшчэ і вырасце ў найбліжэйшы час. Гэта значыць, калі хочаш вучыцца – плаці больш дзяржаве, і ўсё роўна, што твая сям'я з хлеба на ваду перабіваецца. Больш за тое, калі ты нават паступіў на бясплатнае навучанне, то табе ўсё роўна давядзецца плаціць хоць за што-небудзь, гэта ж Беларусь.
Другі варыянт – гэта служба ў войску.
Усё б нічога, але гэта таксама ў Беларусі, а значыць над тваёй галавой навіснуць шалёныя афіцэры, дзедаўшчына і абсалютна не патрэбныя маніпуляцыі. І каранавірус, таму што цяпер армія злегла, і ёй ніхто не дапамагае. І давядзецца маладому прызыўніку праходзіць праз усё гэтае кола абсурду ў хворым стане з высокай верагоднасцю.
Ну, і застаецца трэці варыянт – адстойваць сваё права на нармальную адукацыю ў Беларусі і на нармальнае жыццё. І хутчэй за ўсё рабіць гэта давядзецца не седзячы дома за кампутарам, а на вуліцах».
Сцягвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Баста» і стварайце гісторыю свабоднай Беларусі.