«Раскосмас» за «суму з вялікай колькасцю нулёў» стварыў «дзірку ад абаранка»

• 9.04.2020, 18:22

Дзель замежнай электронікі ў расейскіх грамадзянскіх спадарожніках сувязі дасягае 70%.

Графікі вырабу касмічных апаратаў «Інфармацыйнымі спадарожнікавымі сістэмамі» (ІСС) сарваныя ў выніку затрымак у пастаўках камплектуючых ад субпадрадчыкаў, гаворыцца ў публікацыі «Спагнанне за дысцыпліну» газеты «Сибирский спутник», паведамляе «Лента.ру».

У публікацыі выдання вядучага прадпрыемства «Раскосмасу», які займаецца стварэннем спадарожнікаў, абмяркоўваецца Савет галоўных канструктараў, які прайшоў у сакавіку ў ІСС. Сцвярджаецца, што «Раскосмас» чатыры гады таму атрымаў ад дзяржавы для ІСС на распрацоўку апаратуры для спадарожнікаў «суму з вялікай колькасцю нулёў», у выніку чаго, са слоў намесніка кіраўніка дзяржкарпарацыі Міхаіла Хайлава, «на выхадзе [атрымалася] дзірка ад абаранка».

Са слоў вядучага мэнэджара праекту «Гланас-К2» Юрыя Скобелева, «Расейскія касмічныя сістэмы», Навукова-вытворчая карпарацыя «Сістэмы прэцызійныя прыборабудавання» і «Расейскі інстытут радыёнавігацыі і часу» яшчэ не скончылі наземную эксперыментальную адпрацоўку бартавой апаратуры, якая ўжо павінна стаяць на спадарожніках.

«У большасці выпадкаў затрымка паставак бартавой апаратуры звязаная з неабходнасцю імпартазамяшчэння камплектуючых. Але зноў і зноў спасылацца на гэтую праблему ўжо проста нельга - замежныя санкцыі больш не могуць служыць апраўданнем для зрушэння тэрмінаў», - гаворыцца ў артыкуле.

РІА «Новости» са спасылкай на крыніцу паведамлялі, што дзель замежнай электронікі ў расейскіх грамадзянскіх спадарожніках сувязі дасягае 70 адсоткаў.