У Францыі праз каранавірус вызвалілі больш за 6000 зняволеных

• 4.04.2020, 18:46

Гэта 10% асоб, якія ўтрымліваліся ва ўстановах адбыцця пакарання.

У Францыі праз эпідэмію каранавіруса вызвалілі 6266 зняволеных, гэта 10% асоб, якія ўтрымліваліся ва ўстановах адбыцця пакарання.

Пра гэта паведамляе DW.

23 сакавіка паміж прадстаўнікамі міністэрства юстыцыі і прафзвязамі турэмных наглядчыкаў была прынятая адпаведная пастанова з мэтай памяншэння колькасці людзей у турмах.

Вызваляюць тых, хто быў асуджаны за нязначныя злачынствы і хто добра сябе паводзіў падчас зняволення. Таксама вызваляюць зняволеных, якім да канца адбыцця тэрміну пакарання засталося менш за месяц.

Пры гэтым на вызваленых нават не апранаюць электронныя бранзалеты. На 1 красавіка ў 188 французскіх турмах утрымлівалася 66 309 чалавек.

Раней паведамлялася, што каранавірус быў выяўлены ў 48 зняволеных і 114 супрацоўнікаў турмаў. Праваабаронцы заклікаюць вызваліць зняволеных, якім засталося правесці ў турме менш за паўгода.

Варта адзначыць, што Францыя не першая краіна, якая ідзе на такія крокі ў спробах прадухіліць распаўсюджванне каранавіруса. Раней рашэнне аб часовым вызваленні 85000 зняволеных прыняў Іран.