Менчукі актыўна вядуць барацьбу з «Табакеркамі»

• 9.02.2020, 21:59

Для гэтага выкарыстоўваюцца розныя метады.

Тое, што менчукі прынялі «Табакеркі» ў штыкі, стала ясна з самага пачатку, але не ўсе ўяўлялі, да якіх маштабаў можа дайсці нацыянальнае абурэнне. Ад пачатку лютага менчукі разышліся не на жарт, піша «Онлайнер».

Амаль кожны дзень у Менску знаходзяць новую размаляваную «Табакерку». Нягледзячы на спосаб барацьбы з тытунёвымі шапікамі, большасць графіці прытрымліваюцца вельмі мірнай рыторыкі: заклікаюць выконваць здаровы лад жыцця.

Прычыны абурэння менчукоў вядомыя. У нулявыя ўлады сталіцы выкасілі з менскіх вуліц усе шапікі, загубіўшы не адзін малы і сярэдні бізнэс. І трыумфальнае вяртанне шапікаў у выглядзе раздробнай сеткі рэалізацыі тытунёвай прадукцыі выклікае буру здзіўлення. Аднак «табакеркам» пашкоджваюць не толькі ў Менску. У Віцебску, напрыклад, органы правапарадку расследуюць выпадак пажару ў адной з «табакерак».