Кітайскі эсмінец накіраваў лазер на самалёт-выведнік ВМС ЗША
- 28.02.2020, 11:12
Інцыдэнт адбыўся прыкладна за 611 км на захад ад выспы Гуам.
Кітайскі эсмінец накіраваў лазер на самалёт-выведнік амерыканскіх Вайсковых марскіх сіл P-8 Poseidon. У ВМС назвалі дзеянні карабля небяспечнымі і непрафесійнымі, гаворыцца ў заяве, апублікаванай на сайце Ціхаакіянскага флоту, паведамляе РБК.
Са звестак вайскоўцаў, інцыдэнт адбыўся 17 лютага прыкладна за 611 км на захад ад выспы Гуам. У паведамленні флоту адзначаецца, што P-8 Poseidon знаходзіўся ў міжнароднай паветранай прасторы ў адпаведнасці з дзейнымі нормамі. Там адзначылі, што выкарыстаны кітайцамі лазер патэнцыйна можа нанесці сур'ёзную шкоду экіпажу самалёта і маракам, а таксама карабельным і авіяцыйным сістэмам.
У траўні 2018 года ЗША абвінавацілі кітайскіх вайскоўцаў у спробе асляпіць лазерам пілотаў амерыканскіх самалётаў у Афрыцы. Паводле інфармацыі Вашынгтона, тады былі зафіксаваныя тры выпадкі выкарыстання лазера. Ва ўсіх выпадках прамень зыходзіў з кітайскай ваеннай базы ў Джыбуці, якая размешчаная побач з экспедыцыйнай базай войска ЗША «Кэмп-Леман».