Турцыю ўскалыхнуў магутны землятрус

• 23.02.2020, 17:33

Эпіцэнтр землятрусу размешчаны на тэрыторыі Ірана.

Магутны землятрус, эпіцэнтр якога размешчаны на тэрыторыі Ірана, нанёс значныя разбурэнні ў турэцкай правінцыі Ван. Паводле папярэдніх звестак, загінулі дзевяць чалавек, яшчэ 37 – пацярпелі.

Пра гэта паведамляе турэцкае выданне Hurriyet (пераклад – apostrophe.ua).

Землятрус адбыўся ў нядзелю, 23 лютага, у 01:26 ночы паводле мясцовага часу ў раёне Дэрэбучак (Іран) на глыбіні 14,76 км. Магнітуда падземных штуршкоў складала 5,7 бала.

У правінцыі Ван на ўсходзе Турцыі шмат будынкаў было пашкоджана, людзі апынуліся пад заваламі. У пацярпелы ад землятрусу рэгіён выпраўленыя пошукава-выратавальныя групы.

Тым часам новыя падземныя штуршкі магнітудай 4,5 адбыліся ў цэнтральнай турэцкай правінцыі Конья. Паведамленняў пра пацярпелых не паступала.