У Беларусі выяўленыя першыя падробкі новых 100-даляравых купюраў

• 21.02.2020, 9:20

Іх прынёс у банк жыхар Ліды.

У Лідзе 61-гадовы мясцовы жыхар 17 лютага прынёс у банк для абмену тры купюры наміналам 100 даляраў ЗША. Банкноты выклікалі сумневы ў сапраўднасці ў супрацоўніка банка, пра што было паведамлена ў міліцыю, паведамляе sudexpert.

Як патлумачыў мужчына, гэтыя банкноты ён абмяняў у невядомага грамадзяніна на рынку яшчэ некалькі гадоў таму. Канфіскаваныя купюры былі накіраваныя на даследаванне ў Лідскі міжраённы аддзел Дзяржаўнага камітэта судовых экспертызаў.

Паводле высноваў эксперта, адзін з грашовых білетаў з'яўляецца сапраўдным. А вось дзве іншыя 100-даляравыя купюры новага ўзору вырабленыя не прадпрыемствам, якое ажыццяўляе вытворчасць дзяржаўных грашовых знакаў Федэральнай рэзервовай сістэмы ЗША.

Мадэрнізаваныя банкноты наміналам 100 даляраў выпусцілі ў ЗША блізу пяці гадоў таму, і да нядаўніх часоў перамагчы іх новыя сродкі абароны ў зламыснікаў не атрымлівалася.

Аднак з пачатку года на даследаванне ў экспертныя падраздзяленні вобласці ўжо другі раз трапляюць фальшывыя стодаляравыя купюры новага ўзору.