Працэс міжнароднай ізаляцыі рэжыму дайшоў да яго ўлюбёнай цацкі

• Валер Карбалевіч
• 8.12.2020, 12:51

Цяперашнія санкцыі МАК - беспрэцэдэнтныя.

Не ўпершыню беларускія ўлады трапляюць у такую сітуацыю. Падчас Алімпійскіх гульняў 2004 года ў Афінах Грэцыя не дала дазвол на прыезд міністра спорту Беларусі Юрыя Сівакова, які быў у спісе неўязных у краіны ЕЗ. Тады ў Лукашэнкі ставала здаровага сэнсу не прарывацца самому на тую Алімпіяду, каб не здарыўся скандал.

А ў 2012 годзе скандал здарыўся. Лукашэнка моцна хацеў патрапіць на Алімпійскія гульні ў Лондан. Аднак Вялікабрытанія адмовіла, бо беларускі кіраўнік быў у спісе неўязных у краіны ЕЗ.

Так што Лукашэнку не звыкаць.

Але цяперашнія санкцыі МАК да Беларусі беспрэцэдэнтныя. Як і самі прычыны іх увядзення (пераслед спартоўцаў праз іх палітычную пазіцыю). Пад санкцыі патрапіў увесь нацыянальны алімпійскі камітэт. Ён пазбаўлены фінансавання ад МАК, што асабліва важна. А спартоўцы, выключаныя з нацыянальных каманд паводле палітычных прычын, змогуць узяць удзел у сусветных спаборніцтвах і Алімпіядзе.

Працэс міжнароднай ізаляцыі беларускага палітычнага рэжыму дайшоў да ўлюбёнай цацкі Лукашэнкі - спорту. І нешта падказвае, што гэта толькі пачатак.

Валерый Карбалевіч, Telegram