ФСБ РФ паведаміла аб перастрэлцы на расейска-ўкраінскай мяжы
- 4.12.2020, 12:56
Адзін чалавек забіты.
У Федэральнай службе бяспекі РФ паведамілі, што на мяжы Расеі і Украіны адбылася страляніна. Паводле версіі ведамства, трое невядомых са зброяй нібыта спрабавалі прарвацца ў Расею з тэрыторыі Украіны, заявілі ва ўстанове.
"На адцінку Памежнай управы ФСБ Расеі ў Белгародскай і Варонежскай вобласці 4 снежня памежным патрулём спыненая спроба парушэння мяжы з Украіны ў РФ трыма ўзброенымі невядомымі", - гаворыцца ў рэлізе.
У ФСБ заявілі, што ў выніку перастрэлкі з памежнікамі адзін з узброеных людзей быў забіты, двое ўцяклі.
"Пры спробе затрымання парушальнікі ўзброена супраціўляліся. У выніку ў адказ на агонь адзін з іх атрымаў раны, не сумяшчальныя з жыццём, двое ўцяклі на тэрыторыю Украіны", - дадае ФСБ.
Украінскія ўлады пакуль інцыдэнт ніяк не каментавалі. З Белгародскай і Варонежскай вобласцю РФ мяжуюць Харкаўская і Луганская вобласці Украіны, але дзе менавіта адбыўся інцыдэнт - пакуль невядома.
Украінская старана пакуль не каментавала гэтую інфармацыю.