Еўрапейская кінаакадэмія абрала найлепшы фільм года

• 13.12.2020, 15:52

Найлепшым прызнаны фільм дацкага рэжысёра.

Еўрапейская кінаакадэмія прызнала дацкі фільм «Яшчэ па адной» найлепшым фільмам года. Пра гэта паведамляе Deadline.com.

Акрамя галоўнай узнагароды, стужка атрымала перамогу яшчэ ў некалькіх намінацыях. Яе стваральнік Томас Вінтэрберг стаў найлепшым рэжысёрам і падзяліў прэмію за сцэнар са сваім суаўтарам Тобіясам Ліндхольмам. Мадс Мікельсен, які выканаў галоўную ролю, названы найлепшым акторам.

На ўзнагароду ў намінацыі «Найлепшы фільм» таксама прэтэндавалі фільмы «Цела хрыстова» польскага рэжысёра Яна Камасы і «Марцін Ідэн» італійца П'етра Марчэла.

Найлепшай актрысай абраная Паўла Бер, якая сыграла ў фільме «Ундзіна». Найлепшым дакументальным фільмам стаў «Калектыў» румынскага рэжысёра Аляксандра Нанау, які распавядае аб карупцыі ў сферы аховы здароўя, якая прывяла да гібелі людзей.