МАК расследуе заявы беларускіх спартоўцаў, якія пацярпелі праз сваю пазіцыю

• 7.10.2020, 20:45

Пра гэта заявіў прэзідэнт Міжнароднага алімпійскага камітэта.

Міжнародны алімпійскі камітэт (МАК) расследуе заявы беларускіх спартоўцаў, якія зазнаюць дыскрымінацыю праз свае палітычныя погляды, заявіў у сераду прэзідэнт МАК Томас Бах.

«Мы вельмі занепакоеныя інфармацыяй, якую мы атрымліваем», - сказаў Бах падчас тэлефоннай канферэнцыі ў канцы пасяджэння выканаўчай рады органа. Ён сказаў, што МАК ужо вёў перапіску з нацыянальным камітэтам і цяпер таксама разгледзіць пытанне пра стыпендыі і іншыя фонды, якія былі накіраваныя ў Беларусь, і пра тое, ці дасягнулі яны тых асоб, для якіх яны прызначаны.

Са слоў Баха, МАК 26 верасня паслаў ліст прэзідэнту НАК Беларусі, каб атрымаць пацвярджэнне, што спартоўцы з Беларусі змогуць працягнуць падрыхтоўку да Гульняў 2020 і 2022 года па-за залежнасці ад іх пункту гледжання ў гэтыя складаныя часы ў Беларусі. «Быў атрыманы адказ, што выбар спартоўцаў для ўдзелу будзе зыходзіць выключна з паказаных імі вынікаў», - сказаў ён.

«Але мы чуем, што напраўду спартоўцы кажуць, што іх Нацыянальны алімпійскі камітэт дыскрымінуе іх толькі з палітычных прычын», - адзначыў кіраўнік МАК.

«Недыскрымінацыя - важная каштоўнасць алімпійскага руху. Вось чаму мы так сур'ёзна ставімся да гэтага», - сказаў Бах. «Выканаўчая рада наважыла, што мы ўзмоцнім наша расследаванне, каб вызначыць, ці выканаў НАК абавязанні ў адпаведнасці з Алімпійскай хартыяй».

«Мы - грамадзянская няўрадавая арганізацыя, і наш мандат абмежаваны спортам. Мы не можам змяняць законы, палітычную сістэму або законы суверэннай краіны, - сказаў Бах. - Але мы вельмі сур'ёзна ставімся да нашага мандату, каб гарантаваць, што НАК любой краіны выконвае Алімпійскую хартыю і каб спартоўцы карысталіся правамі ў адпаведнасці з гэтай хартыяй».

5 кастрычніка свабоднае аб'яднанне спартоўцаў Беларусі адправіла ліст у МАК.

У ім яны расказалі пра пацярпелых праз сваю пазіцыю спартоўцаў, а таксама папрасілі Выканаўчы камітэт:

- правесці належнае расследаванне фактаў дыскрымінацыі і гвалту ў дачыненні да спартоўцаў у Беларусі;

- прыняць захады, прадугледжаныя Алімпійскай хартыяй у дачыненні да НАК Беларусі, між іншым - прыпыніць фінансаванне сяброўства ў НАК Беларусі да нармалізацыі сітуацыі;

- дапамагчы спартоўцам, якія пацярпелі ад незаконных рэпрэсій, удзельнічаць у спартыўных мерапрыемствах пад эгідай МАК у выпадку, калі яны былі несправядліва адхілены ад удзелу ў такіх мерапрыемствах НАК Беларусі.

Подпісы пад дакументам паставіла ініцыятыўная група свабоднага аб'яднання спартоўцаў Беларусі: Аляксандр Апейкін, Канстанцін Якаўлеў, Кацярына Сныціна, Яўген Цуркін, Артур Удрыс, Ягор Мешчаракоў, Мікіта Мешчаракоў, Аляксандра Герасіменя, Сцяпан Папоў, Аляксандра Раманоўская, Васіль Хамутоўскі, Андрэй Краўчанка і Іван Ганін.

Дадамо, што ў дадатку 1 да ліста былі прыведзены 22 выпадкі, калі беларускія спартоўцы, трэнеры і функцыянеры пацярпелі праз сваю грамадзянскую пазіцыю.