Навукоўцы высветлілі, чаму глабальнае пацяпленне сагравае ночы хутчэй, чым дні

• 3.10.2020, 14:22

Тлумачэнне гэтаму феномену знайшлі брытанскія біёлагі.

Брытанскія біёлагі з Эксетэрскага ўніверсітэта высветлілі, што глабальнае пацяпленне больш адбіваецца на начной тэмпературы, чым на дзённай.

Як паведамляе Independent, да гэтай высновы каманда прыйшла, вывучыўшы звесткі другіх назіранняў ва ўсім свеце за 34 гады.

Для даследавання навукоўцы прааналізавалі гадзінныя запісы тэмпературы, хмарнага покрыва і вільготнасці, сабраныя з 1983 да 2017 года. Як выявілася, за гэты час на 54% тэрыторыі Зямлі начная тэмпература падвышалася значна хутчэй за дзённую.

Прычынай такога асіметрычнага пацяплення можа быць зрух хмарнага покрыва, мяркуе вядучы аўтар даследавання Дэніэл Кокс: аблокі дапамагаюць астуджаць зямлю ўдзень і захоўваць цяпло ўначы. Пры гэтым у хмарных рэгіёнах змяняецца не толькі тэмпература: навукоўцы заўважылі, што ў іх клімат становіцца больш вільготным.

Са слоў Кокса, даследаванне ягонай каманды звяртае ўвагу на праблемы, якія выклікае асіметрычнае пацяпленне. Ён адзначыў, што з прычыны такіх зменаў некаторыя жывёлы, кузуркі ці расліны могуць больш пацярпець ад цеплавога ўдару і абязводжвання, чым іншыя, а гэта выкліча дысбаланс у агульнай экалагічнай сістэме.