Сёння - 75-годдзе вызвалення канцлагера «Аўшвіц-Біркенаў»

• 27.01.2020, 15:38

У памятных мерапрыемствах возьмуць удзел прэзідэнты Польшчы, Украіны, Ізраіля.

27 студзеня будзе адзначацца 75-годдзе вызвалення канцлагера «Аўшвіц-Біркенаў», створанага нацыстамі пад польскім горадам Асвенцымам, і Міжнародны дзень памяці ахвяраў Халакосту. У памятных мерапрыемствах возьмуць удзел былыя вязні лагера, прэзідэнт Польшчы Анджэй Дуда, некалькі дзясяткаў прадстаўнікоў дзяржаў, у тым ліку - прэзідэнты Украіны, Ізраіля і прэм'ер-міністры, а таксама старшыня Сусветнага габрэйскага кангрэса Рональд Лаўдэр, паведамляе «Польскае радыё».

Міжнародны дзень памяці ахвяр Халакоста ўстаноўлены Генеральнай Асамблеяй ААН 1 лістапада 2005 года. Ініцыятарамі прыняцця дакумента выступілі Ізраіль, Канада, Аўстралія, Расея, Украіна, ЗША, а суаўтарамі - яшчэ больш за 90 дзяржаў.

Дзень 27 студзеня быў абраны таму, што ў гэты дзень савецкія войскі вызвалілі канцэнтрацыйны лагер «Аўшвіц-Біркенаў».

У Польшчы традыцыйна памятныя мерапрыемствы з нагоды Міжнароднага дня памяці ахвяраў Халакоста праходзяць у Асвенцыме і ў Варшаве каля помніка Героям гета.