Куды знік Рамзан Кадыраў?

• 20.01.2020, 16:20

Тыднёвую адсутнасць Кадырава на публіцы актыўна абмяркоўваюць у Чачэніі.

Тыднёвую адсутнасць кіраўніка Чачэніі Рамзана Кадырава ў медыйнай прасторы актыўна абмяркоўваюць у рэспубліцы. Пра гэта піша «Кавказский узел» са спасылкай на мясцовых жыхароў.

Суразмоўцы выдання адзначылі, што Кадырава не было ў Маскве падчас абвяшчэння паслання прэзідэнта Расеі Уладзіміра Пуціна Федэральнаму сходу. Акрамя таго, кіраўнік Чачэніі адсутнічаў на пятнічнай малітве ў рэспубліцы, хоць мясцовыя тэлеканалы заўсёды паказвалі яго разам з атачэннем.

Апошні кароткі відэаролік, зняты, як мяркуецца, Кадыравым, быў апублікаваны ў Instagram-акаўнце online_chechnya. На кадрах захаваны ілюмінатар самалёта падчас начнога палёту. Голас кажа за кадрам: «Салам алейкум. Калі што, мы на месцы. Алаху акбар. Ахмат - сіла».

Кіраўнік Чачэніі 15 студзеня абвясціў аб сваёй часовай непрацаздольнасці. Свае паўнамоцтвы ён перадаў старшыні ўрада Мусліму Хучыеву. Прэс-сакратар Кадырава Альві Карымаў патлумачыў, што кіраўнік рэспублікі праходзіць курс лячэння, «які патрабуе медыцынскіх працэдур». Са слоў Карымава, Канстытуцыяй Чачэнскай Рэспублікі прадугледжанае ўскладанне выканання абавязкаў кіраўніка на старшыню ўрада ў выпадку часовай непрацаздольнасці або знаходжання ў адпачынку.