Беларускі завод «Юнісан» прыпыніў зборку электрамабіляў
- 4.09.2019, 19:57
Але паспеў прадаць пробную партыю.
Пра гэта dev.by паведаміў дырэктар ТАА «Юнісан Аўто» Дзмітрый Шэлег.
- На гэты момант завод не вырабляе электрамабілі. Зборка спыненая, бо завод знаходзіцца ў завяршальнай стадыі рэканструкцыі. Выпуск электрамабіляў аднавіцца пасля запуску вытворчасці поўнага тэхналагічнага цыкла, уключаючы зварку і афарбоўку. Паводле аптымістычных прагнозаў, гэта адбудзецца ў канцы года, - распавёў Дзмітрый Шэлег.
Ён таксама паведаміў, што сёлета заводу атрымалася прадаць на беларускім і расейскім рынках пробную партыю (некалькі дзясяткаў) сабраных кітайскіх электрамабіляў Zotye E200EV.
«Юнісан» сертыфікаваў мадэль Zotye E200EV у канцы 2018 года. Продажы мадэлі на ўнутраным рынку стартавалі ў пачатку гэтага года. Сёлета завод планаваў сертыфікаваць яшчэ дзве мадэлі электрамабіляў - седан і сярэдніх памераў красовер. Патэнцыйны попыт на электрамабілі ў Беларусі, паводле ацэнак Дзмітрыя Шэлега, складае блізу 1,0 тысяч адзінак.