Відэафакт: Ілан Маск паказаў карабель для палётаў на Месяц і Марс
- 29.09.2019, 15:10
Ён можа адначасова перавозіць да 100 астранаўтаў і грузы.
Кампанія SpaceX прадставіла шматразовы касмічны карабель, які можа адначасова перавозіць да 100 астранаўтаў і грузы. Паводле словаў генеральнага дырэктара кампаніі Ілана Маска, пілатаваны палёт на Марс можа адбыцца ўжо ў 2025 годзе, паведамляе «Хайтэк».
Генеральны дырэктар SpaceX Ілан Маск абвесціў пра абноўлены графік выпрабаванняў і будаўніцтва шматразовых караблёў, якія здольныя дастаўляць астранаўтаў і грузы на Месяц, Марс і іншыя далёкія касмічныя аб'екты. Маса карабля склала 120 тонаў, а даўжыня – 50 метраў.
Маск таксама паказаў прататып пабудаванага зоркалёта Mk1 на заводзе кампаніі ў Паўднёвым Тэхасе. Ён адзначыў, што першы выпрабавальны палёт на ракеце адбудзецца праз два месяцы.
Кампанія плануе стварыць яшчэ чатыры версіі ракетаносьбіта і правесці першы арбітальны пуск цягам шасці месяцаў. Наступная версія, якая атрымала назву Starship Mk2, ужо будуецца на аб'ектах SpaceX у Флорыдзе.
Раней Ілан Маск абвесціў пра планы каланізацыі Марса. Ён мае намер перавезці на планету мільён чалавек. Паводле ягонага плана, першыя людзі змогуць паляцець на Марс у 2025 годзе. Пры гэтым эксперты касмічнага агенцтва NASA мяркуюць, што першая кіраваная місія на Марс адбудзецца толькі пасля 2030 года.