Сянцоў у Львове прэзентаваў кнігу, напісаную ў расейскім палоне
- 22.09.2019, 18:13
Кніга ўкраінскага рэжысёра была напісаная ў 2017 годзе.
22 верасня вызвалены з расейскага палону ўкраінскі рэжысёр Алег Сянцоў у рамках 26-га Форуму выдаўцоў у Львове прэзентаваў кнігу аўтабіяграфічнай прозы «Маркетэр», інфармуе прэс-служба Львоўскай гарадской рады.
«Гэтую кнігу я напісаў за 11 дзён паўтара гады таму, калі ў мяне быў своеасаблівы адпачынак у лагеры строгага рэжыму. Я даўно яе запланаваў, доўга яе выношваў, прыкінуў, што хачу напісаць. І так супала, што я меў 11 выходных, свабодных дзён, за якія напісаў запланаваныя 11 раздзелаў, тэмаў гэтай кнігі», - сказаў Сянцоў на прэзентацыі.
У «Маркетэры» ідзе гаворка пра студэнцкія гады рэжысёра і ягоных сяброў, распавёў ён.
«Тут няма выдумак, тут усё пра жыццё», - дадаў Сянцоў.
Дырэктарка «Видавництва Старога Лева» Мар'яна Саўка распавяла, што кніга распавядае пра жыццё ўкраінцаў у 90-х гадах.
«Гэта вельмі добрыя тэксты пра няпростае жыццё ў 90-х, якія павінен убачыць свет. Таму мы зрабілі ўсё магчымае, каб расшыфраваць рукапісы Алега і ў кароткі тэрмін выдаць іх на дзвюх мовах», - адзначыла яна.
Сянцоў быў прысуджаны ў РФ да 20 гадоў пазбаўлення волі 25 жніўня 2015 года. Расейскі суд прызнаў яго вінаватым у стварэнні ў Крыме тэрарыстычнай супольнасці і кіраўніцтве ёй, замаху на набыццё выбуховых прылад і незаконным захоўванні агнястрэльнай зброі і боепрыпасаў, двух тэрарыстычных актах і падрыхтоўцы яшчэ аднаго тэракту. Сянцоў сваёй віны не прызнаў.
7 верасня 2019 года паміж Украінай і РФ адбыўся абмен палоннымі ў фармаце «35 на 35». Сярод украінцаў, якія вярнуліся дадому, быў і Сянцоў.
На першай пасля вызвалення прэс-канферэнцыі рэжысёр распавядаў, што прывёз з РФ «22 кг макулатуры», сярод якіх лісты і напісаныя ім кнігі.