У Албаніі адбыўся самы магутны землятрус за 30 гадоў
- 22.09.2019, 15:28
Пацярпелі больш за сто чалавек.
Землятрус магнітудай 5,6 і трохі менш моцны падземны штуршок пасля яго ўскалыхнулі албанскі партовы горад Дурэс у суботу, 21 верасня, разгойдваючы дамы там, а таксама, сярод іншых, у сталіцы Тыране.
Пра гэта паведамляе Еўрапейская праўда са спасылкай на Reuters.
Міністэрства абароны заявіла, што гэта самы магутны землятрус у Албаніі за апошнія 30 гадоў.
"Усе нашы суседзі выбеглі з крыкам. Дзякуй Богу, гэта было нядоўга – блізу 20 секундаў. Гэта быў кашмар на 10 паверсе. Я не памятаю больш магутнага, чым гэты", – сказаў 67-гадовы пенсіянер Агім у Тыране.
Міністарка аховы здароўя Агерта Манастырліу заявіла, што 68 чалавек атрымалі дапамогу ў выніку траўмаў у Тыране і Дурэсе. Большасць пацярпелых – гэта людзі, якія атрымалі траўмы, калі выбягалі з дамоў у паніцы.
Многія з іх былі выпісаныя пасля лекавання, сказала яна.
"Менш людзей прыходзіць у лякарні (пасля першай спешкі)", – сказала Манастырліу журналістам.
У рэгіёне Тыраны пашкоджаныя 48 дамоў і тры шматкватэрныя дамы, а ў рэгіёне Дурэса – 42 дамы і чатыры шматкватэрныя дамы, заявіла міністарка абароны Олта Хачка на прэс-канферэнцыі.
"Самае галоўнае, што стратаў сярод людзей няма", – дадала яна.
Многія албанцы да гэтага часу не вярнуліся ў свае дамы ў сталіцы Тыране і партовым горадзе Дурэсе пасля землятрусу магнітудай 5,8, праз які траўмавана 105 чалавек і сотні дамоў былі пашкоджаныя.
Улады сцвярджаюць, што пасля землятрусу ў суботу днём было зафіксавана больш за 100 наступных штуршкоў.
Пашкоджанні атрымалі блізу 600 дамоў. У Тыране, Дурэсе і іншых заходніх і цэнтральных раёнах узніклі праблемы з энэрга- і водазабеспячэннем.
Многія людзі, якія пакінулі свае дамы, знаходзіліся ў часовых сховішчах, калі эксперты ў нядзелю аглядалі пашкоджаныя дамы.
Міністарка абароны Олта Хачка, выступаючы на пасяджэнні Кабінета міністраў, якое адбылося ў нядзелю, сказала, што "на шчасце, нафтавыя свідравіны не пашкоджаныя".
Геалагічная служба ЗША дала землятрусу пачатковую магнітуду 5,6, у той час як Албанскі інстытут геалагічных навук паведаміў, што зарэгістраваў 5,8.