У Парыжы аднавіліся пратэсты «жоўтых камізэлек»
- 21.09.2019, 17:49
Прэзідэнт Францыі Эмануэль Макрон заявіў, што гэта добра, калі людзі выказваюць сваё меркаванне.
Дзясяткі дэманстрантаў былі затрыманыя ў Парыжы падчас антыўрадавай акцыі пратэсту руху «жоўтых камізэлек», паведамляе «Европейская правда».
Паводле інфармацыі паліцыі Парыжа, на гэты момант затрыманыя 106 мітынгоўцаў, а таксама аштрафаваныя, прынамсі, 104 чалавекі.
У французскай сталіцы сёння на вуліцы выйшлі блізу 7000 паліцыянтаў, улады асцерагаюцца, што «жоўтыя камізэлькі» могуць зладзіць бойкі з удзельнікамі маршу супраць змены клімату.
Паводле інфармацыі тэлеканала BFM, паліцыя ўжыла слезацечны газ супраць групы дэманстрантаў, якія рухаліся на акцыю пратэсту на Елісейскія палі.
Суботнія пратэсты праходзяць у штогадовы Дзень спадчыны Францыі, калі вядомыя памятныя мясціны адкрываюць свае дзверы для публікі.
У пятніцу прэзідэнт Эмануэль Макрон сказаў, што гэта добра, калі людзі могуць выказаць сваё меркаванне, але папрасіў, каб пратэсты праходзілі «спакойна».
Рух «жоўтых камізэлек» пачаўся ў лістападзе мінулага года ў сувязі з ростам коштаў паліва, які перарос у штотыднёвыя пратэсты, што доўжыліся да вясны.
Пратэсты заахвоцілі Макрона правесці рэформы, а менавіта - знізіць падаткі і больш дэцэнтралізаваць урад.