Фотафакт: Рака Піна ў Пінску цалкам пазелянела

• 16.09.2019, 19:22

Што адбылося?

Рака Піна ў Пінску цалкам пакрылася водным папаратнікам з роду Сальвінія. Што адбылося і ці хвалявацца мясцовым?

Фотаздымкі «пазелянелай» Піны хутка разышліся па мясцовых сацыяльных сетках. У каментарах карыстальнікі называлі Сальвінію «траўнікам», «футбольным полем» і выказвалі боязь з нагоды будучага палескага суднаходства.

Але падставы для хваляванняў няма, паведаміла tut.by начальніца пінскай раённай інспекцыі прыродных рэсурсаў і аховы навакольнага асяроддзя Надзея Міхнюк. З яе слоў, з'яўленне раскі (Сальвініі) на Піне выклікана двума фактарамі: устаноўкай на час рэканструкцыі асноўнага моста пантоннай канструкцыі для руху аўтатранспарту, якая аслабіла плынь ракі, і засушлівае лета.

- Адказныя службы манітораць якасць вады. Пакуль ніякай інфармацыі аб тым, што вада пагоршылася, у нас няма, - паведаміла Надзея Міхнюк.

Рэканструкцыя моста праз Піну пачалася ў красавіку 2019 года. Чакаецца, што рух па ім адкрыецца ў канцы 2019-га - пачатку 2020 года.