Прэзідэнт Філіпін дазволіў грамадзянам страляць у чыноўнікаў-карупцыянераў

• 13.09.2019, 19:21

Радрыга Дутэртэ заявіў, што страляць трэба так, каб параніць несумленнага чыноўніка, але не забіць яго.

Прэзідэнт Філіпінскіх выспаў Радрыга Дутэртэ дазволіў грамадзянам страляць у чыноўнікаў-карупцыянераў.

Пра гэта ён сказаў падчас публічнага выступу на адкрыцці ўрадавага цэнтра ў Батанге, паведамляе nv.ua са спасылкай на Manila Bulletin.

Аднак, са слоў прэзідэнта, страляць трэба так, каб параніць несумленнага чыноўніка, але не забіць яго.

«Калі вы плаціце падаткі, зборы, мыты і гэтак далей, а гэтыя дурні патрабуюць хабар, стукніце іх. Калі ў вас ёсць зброя, вы можаце стрэліць у іх. Але не забівайце іх, бо інакш вы можаце не атрымаць памілаванне», - сказаў прэзідэнт.

Дутэртэ падкрэсліў, што нягледзячы на дазвол, асобу, якая стрэліла ў чыноўніка, да адказнасці ўсё роўна прыцягнуць і пакараюць цялесна, а ад турмы ён паабяцаў у такіх выпадках абараняць.

«Вас не пасадзяць у турму. Вы атрымаеце толькі выпрабавальны тэрмін. Калі вы падстрэлілі дурнога злодзея, я абараню вас», — запэўніў прэзідэнт.