Беларусы патрабуюць прыраўняць ровары да аўто

• 25.08.2019, 17:01

Беларусы прапануюць абавязаць раварыстаў атрымліваць пасведчанні кіроўцаў.

У ДАІ наважылі прыраўнаваць электрасамакаты да мапедаў і матацыклаў. Нагадаем, са слоў прадстаўніка УДАІ МУС Станіслава Салавея электрасамакат можа развіваць хуткасць да 25 км/г. Кіроўцаў такіх дэвайсаў аднясуць да пешаходаў. А вось тых, хто карыстаецца больш магутнымі прыладамі (з хуткасцю ад 25 км/г), абавяжуць мець пасведчанне кіроўцы, каб на іх ездзіць. Як у выпадку з мапедамі і матацыкламі: на іх патрэбныя яшчэ тэхагляд і страхоўка, піша kyky.org.

Пасля анонсу гэтых змяненняў на сайце petitions.by з'явілася петыцыя пад назвай «Ровары больш бяспечныя за скутэры?». Яе аўтары гэтак жа ўспомнілі словы Салавея, і абурыліся: «На шашы (і не толькі) ровары лёгка могуць развіць хуткасць звыш 25 км/г, дык чаму ж такіх веласіпедыстаў таксама не прыраўняць да транспартнага сродку? Хуткасць тая ж, небяспека для пешаходаў пры руху па ходніках тая ж. Розніца толькі ў прыродзе паскарэння».

Аўтары петыцыі прапануюць абавязаць веласіпедыстаў, якія ездзяць хутчэй за 30 км/г, гэтак жа атрымліваць пасведчанне, як у выпадку з матацыкламі, мапедамі і ўжо некаторымі электрасамакатамі.