«Адзін заплечнік на два гады»: Як бацькі з Віцебска збіраюць дзяцей у школу
- 23.08.2019, 21:53
Крыху больш за тыдзень засталося да пачатку навучальнага года.
І калі большасць школьнікаў атрымліваюць асалоду ад апошніх дзён канікул, то іх бацькі спешна дакупляюць дзецям усё неабходнае для будучай вучобы.
Сабраць дзіця ў школу «з нуля» - задавальненне нятаннае. Добра, калі нешта засталося з папярэдняга года, і хоць на гэтым можна трохі зэканоміць.
«Віцебскі кур'ер» пагаварыў з бацькамі з Віцебска і даведаўся, як яны рыхтуюцца да школы.
Зэканоміць дапамаглі акцыі ў крамах
Ірына, мама дзвюх дачок малодшага школьнага ўзросту:
- Усё неабходнае для школы я купляла не за адзін раз, а на працягу трох летніх месяцаў. Іду, напрыклад, па прадукты ў краму, бяру заадно пару альбомаў для малявання. У наступны раз нясу на касу набор алоўкаў ці клей. Увогуле сума адной куплі непрыкметная, а ў школе дзецям спатрэбіцца.
Самыя вялікія выдаткі звязаны з адзеннем і абуткам. На шчасце, мае дзеці вучацца не ў гімназіі, таму асаблівая форма не патрэбная. Але настаўнікі просяць прытрымлівацца класічнага стылю і купіць сінія трыкатажныя камізэлькі. Зэканоміць мне дапамаглі акцыі, якія праходзілі ў віцебскіх крамах. Мабыць, ні адну рэч я не купіла за поўны кошт.
У сярэднім на кожнае дзіця я выдаткавала 200 рублёў. Гэта яшчэ пашанцавала, што з мінулага года ў нас засталіся заплечнікі і абутак, інакш суму можна было смела падвоіць.
Адзін заплечнік на два гады
Алена, мама чацвёртакласніка:
- На чым нельга эканоміць, дык гэта на школьным заплечніку і зменным абутку. Вядома, можна танна купіць на рынку, але тады не варта здзіўляцца, што іх нават на навучальны год не хопіць. А калі набыць якасную дарагую рэч, то яе не на адзін год хопіць. Напрыклад, сыну сёлета заплечнік не патрэбны - стары ў выдатным стане.
Самая дарагая наша купля - касцюм, таму што з мінулага сын вырас. Куплялі яго ў менскай краме са зніжкай, таму выдаткавалі ўсяго 70 рублёў. Па 15 рублёў каштавалі дзве кашулі, 40 рублёў - джэмпер, 45 - спартыўны касцюм, яшчэ рублёў 20 я выдаткавала на ніжнюю бялізну і шкарпэткі.
На канцылярыю у мяне сышло няшмат - блізу 30 рублёў, яшчэ трэба здаць на дадатковую літаратуру 40 рублёў і заплаціць за падручнікі. Разам - блізу 250 рублёў.
Рэчы б/у і куплі на рынку
Алена, мама васьмікласніцы і другакласніка:
- Сабраць у школу дваіх дзяцей для нашай сям'і даволі цяжка, таму даводзіцца эканоміць на куплі адзення. Купляю або на распродажах, у тым ліку праз інтэрнэт, ці, што часцей, прыглядаю б/у варыянты па абвестках.
Многія прадаюць касцюмы, кашулі, кофты-падманкі ў выдатным стане за кошт, які напалову меншы за кошт новай рэчы. Сёлета мне і зусім пашанцавала: паехалі з сынам па аб'яве мераць пінжак, а ў выніку на 70 рублёў купілі ў жанчыны поўны набор: касцюм, спартыўныя штаны, кельні, два гольфы, кашулю, два джэмперы. На год павінна хапіць, хіба што на зіму трэба будзе набыць штаны цяплейшыя. Усяго разам з канцылярыяй атрымалася 100 рублёў.
З дачкой больш складана: б/ у рэчы яна катэгарычна адмаўляецца апранаць, таму даводзіцца рабіць пакупкі на рынку. Там нядорага, але і якасць пакідае жадаць лепшага. Вельмі спадзяюся ўкласціся рублёў у 200.
Сумесная закупка і рынак у Воршы
Наталля, маці трэцякласніка:
- Я ўклалася ў 300. Прычым купіла і партфель, і зменны абутак, і касцюм з кашуляй, і нават восеньскую куртку!
Як мне гэта ўдалося? Частку рэчаў я набыла праз сумесную закупку ў інтэрнэце, частку - нагледзела на рынку ў Воршы. Так-так, там такі ж тавар, як на віцебскіх рынках, а кошты ўдвая ніжэйшыя. А ў нас як раз побач бабуля жыве, таму нават ехаць спецыяльна не давялося.
А колькі вы выдаткавалі, збіраючы дзяцей у школу і на чым змаглі зэканоміць? Дзяліцеся ў каментарах.