Урад Літвы закупляе ёд у таблетках, рыхтуючыся да адкрыцця БелАЭС

• 16.08.2019, 13:50

Ёд у таблетках выкарыстоўваецца для абароны арганізму ад уздзеяння выпраменьвання.

Рыхтуючыся да адкрыцця Астравецкай АЭС у Беларусі, урад абяцае найбліжэйшым часам прыняць пастанову аб тым, як фінансаваць куплю ёду ў таблетках, піша Delfi.

Ёд у таблетках выкарыстоўваецца ў выпадку ядзернай аварыі для абароны арганізму ад уздзеяння выпраменьвання.

"Міністэрства аховы здароўя ў рамках сваёй кампетэнцыі прыклала ўсе намаганні для забеспячэння жыхароў Літвы ёдам у таблетках. - пошук прадаўцоў, узгадненне тэрмінаў пастаўкі, колькасць, канкрэтная ўпакоўка і гэтак далей. Урад вызначыцца з крыніцай фінансавання найбліжэйшым часам і зможа працягнуць працэс набыцця" - паведаміла BNS урадавая канцылярыя.

Паводле звестак Міністэрства аховы здароўя, з прадаўцом была дасягнутая дамоўленасць аб тым, што патрэбная колькасць ёду ў таблетках можа быць дастаўленая ў Літву на працягу аднаго месяца.

Таблеткі плануецца размясціць сярод населеных пунктаў да пачатку дзейнасці электрастанцыі гэтай восенню. Раней было абвешчана, што будзе закуплена больш за 4 мільёны пачкаў ёду ў таблетках, першапачаткова для распаўсюджвання сярод тых, хто знаходзіцца бліжэй да электрастанцыі на мяжы краіны. На гэта плануецца выдаткаваць блізу 900 тысяч еўраў.

"Чакаецца, што лекі будуць пастаўленыя ў Літву на часе", - сказалі ў міністэрстве.

Муніцыпалітэт Вільні з уласнай ініцыятывы ўжо набыў блізу 2000 пачкаў ёду ў таблетках, якія, у выпадку радыяцыйнай пагрозы, будуць перададзеныя муніцыпальным службоўцам.