У Малдове скасавалі змешаную выбарчую сістэму
- 15.08.2019, 14:20
Акрамя вяртання да прапарцыйнай сістэмы, закон прадугледжвае зніжэнне выбарчага парога для партый.
Парламент Малдовы 15 жніўня прыняў у трэцім канчатковым чытанні законапраект аб вяртанні да прапарцыйнай сістэмы выбараў у парламент.
Як паведамляе NewsMaker, за гэта прагаласавалі 59 дэпутатаў кіроўнай кааліцыі і прадстаўнікі фракцыі «Шор».
Як заявіў на пасяджэнні старшыня прававога камітэта парламента Сэрджыа Літвіненка, камісія ўлічыла ўсе папраўкі дэпутатаў пасля разгляду праекта ў двух чытаннях.
Законапраект, акрамя вяртання да прапарцыйнай сістэмы, прадугледжвае зніжэнне выбарчага парога для партый з 6% да 5% і з 8% да 6% для выбарчых блокаў, дазваляе галасаваць за мяжой па пратэрмінаваных пашпартах, дазваляе грамадзянам, якія атрымалі даходы за мяжой, ахвяраваць грошы партыям.
Таксама дакумент прадугледжвае вяртанне забароны на агітацыю ў дзень выбараў і за дзень да выбараў.
Нагадаем, парламент Малдовы 31 ліпеня таксама ўвёў мараторый на выдачу грамадзянства краіны ў абмен на інвестыцыі.