Еўразвяз заклікаў Расею захаваць дзеянне дамовы аб РСМД

• 14.07.2019, 19:40

Дзеянне дамовы можа скончыцца 2 жніўня 2019 года.

У нядзелю, 14 ліпеня, Еўрапейскі Звяз апублікаваў заяву, у якой заклікаў Расею захаваць Дамову аб ліквідацыі ракет сярэдняй і меншай далёкасці (ДРСМД). Заява ад імя прадстаўніка замежнапалітычнай службы ЕЗ размешчаная на сайце Еўрапейскага Звязу. У заяве гаворыцца, што падпісаная 8 снежня 1987 года Міхаілам Гарбачовым і Рональдам Рэйганам Дамова аб ліквідацыі ракет сярэдняй і меншай далёкасці "зрабіла істотны ўнёсак у еўрапейскую і міжнародную бяспеку цягам 30 гадоў", паведамляе "Радыё Свабода".

Еўрапейскі Звяз заклікаў усе дзяржавы падтрымліваць цэласнасць міжнароднага рэжыму раззбраення і нераспаўсюджвання ядзернай зброі.

Заява ўключае асобны зварот да Расейскай Федэрацыі, у якім ЕЗ выказвае ўстурбаванасць у сувязі з распрацоўкай у Расеі ракетных комплексаў наземнага базавання 9 М729.

Злучаныя Штаты 1 лютага прыпынілі выкананне сваіх абавязанняў паводле дамовы. Прэзідэнт Дональд Трамп абвінаваціў Расею ў тым, што яна шмат гадоў парушае дамову. Вашынгтон убачыў парушэнне ў разгортванні ракетных комплексаў "Наватар" 9M729. 18 чэрвеня Дзярждума РФ прыняла закон, аб прыпыненні ўдзелу Расеі ў ДРСМД. Прэзідэнт РФ Уладзімір Пуцін 3 ліпеня ратыфікаваў гэты закон.

Дзеянне ДРСМД можа скончыцца 2 жніўня 2019 года. "Гэтыя дні - гэта астатняя магчымасць для дыялогу і прыняцця неабходных захадаў для захавання гэтага важнага кампанента архітэктуры еўрапейскай бяспекі", - гаворыцца ў заяве Еўразвязу.

ЕЗ заклікае Расею "неадкладна прыняць сур'ёзныя і празрыстыя дзеянні, якія забяспечваюць цалкам магчымае для праверкі выкананне ДРСМД".

"Калі будзе немагчымым захаваць ДРСМД, то рэакцыя NАТО будзе скаардынаванай і абарончай", - заявіў 5 ліпеня генеральны сакратар NАТО Енс Столтэнбэрг, які намагае, што Расея павінна знішчыць новыя ракетныя комплексы да 2 жніўня.