Апазіцыя ў Судане пачала страйк ва ўсёй краіне

• 9.06.2019, 14:12

Ад удзелу ў страйку вызваленыя толькі лекары і персанал, які ажыццяўляе догляд за хворымі.

У Судане апазіцыя пачала ў нядзелю, 9 чэрвеня, акцыю грамадзянскага непадпарадкавання ва ўсёй краіне. Напярэдадні арганізатары пратэсту з прафзвязу Асацыяцыя прафесіяналаў Судана (SPA) заявілі, што акцыя скончыцца толькі пасля таго, як да ўлады прыйдзе грамадзянскі ўрад, паведамляе dw.com.

«Паслядоўнае непадпарадкаванне - гэта тое, што ахопіць іх сэрцы жахам і дапаможа нам перамагчы», - заявілі прадстаўнікі SPA на старонцы арганізацыі ў Twitter.

Ад удзелу ў страйку вызваленыя толькі лекары і персанал, які ажыццяўляе догляд за хворымі.

За дзень да гэтага два лідары апазіцыі - генеральны сакратар паўстанцкай групы SPLM-N Ізмаіл Джалаб і яе спікер Мубарак Ардол былі затрыманыя праз некалькі гадзін пасля іх сустрэчы з прэм'ер-міністрам Эфіопіі Абіем Ахмедам, які выступіў пасярэднікам у канфлікце паміж апазіцыйным «Рухам за свабоду і перамены» і Вайсковай радай Судана. Пра гэта паведамляе нямецкі грамадска-прававы тэлеканал ARD.

Вайсковая рада прыйшла да ўлады ў Судане пасля таго, як шматгадовы кіраўнік дзяржавы Амар аль-Башыр у красавіку 2019 года быў зрынуты падчас працяглых масавых пратэстаў.

У сярэдзіне траўня апазіцыя дамовілася з вайсковай радай аб тым, што цягам трох гадоў краінай будзе кіраваць пераходная рада з прадстаўнікоў вайсковай рады і чальцоў апазіцыйнага руху.

Аднак пасля бакам не ўдалося дасягнуць адзінства ў пытанні аб тым, хто ўзначаліць гэты орган. Праз некалькі тыдняў пасля пачатку перамоваў вайсковая рада 3 чэрвеня прыступіла да разгону намётавага лагера апазіцыі ў сталіцы краіны Хартуме.

Паводле звестак міністэрства аховы здароўя Судана, у выніку сутыкненняў загінуў 61 чалавек.