На заўтра ў Беларусі абвешчанае штармавое папярэджанне
- 27.06.2019, 13:24
Парывы ветру будуць дасягаць 20 метраў за секунду.
На 28 чэрвеня сіноптыкі абвесцілі ў Беларусі аранжавы ўзровень небяспекі. Як і сёння, у пятніцу парывы ветру будуць дасягаць 20 метраў за секунду. Пра гэта паведамляе tut.by са спасылкай на Белгідрамет Мінпрыроды.
«28 чэрвеня, у пятніцу, у многіх раёнах краіны і ў Менску захаваецца вецер парывамі да 15–20 м/с», – апавялі сіноптыкі.
Рэкамендацыі МНС пры моцным ветры
– Прыбярыце гаспадарчыя рэчы з двара і балконаў у дом (склеп), абрэжце сухія дрэвы, якія могуць нанесці шкоду вашаму жыллю.
– Машыну пастаўце ў гараж, пры адсутнасці гаража машыну варта паркаваць удалечыні ад дрэваў, а таксама слабаўмацаваных канструкцый.
– Знаходзячыся на вуліцы, абыходзьце хісткія будынкі і дамы з няўстойлівым дахам.
– Пазбягайце дрэваў і разнастайных збудаванняў павышанай рызыкі (мастоў, эстакадаў, трубаправодаў, ліній электраперадачы, патэнцыйна небяспечных прамысловых аб'ектаў).
Атмасферны фронт нясе ў Беларусь пахаладанне. У пятніцу чакаецца прахалоднае ветранае надвор'е, месцамі па краіне пройдуць кароткачасовыя дажджы. Тэмпература паветра мінімальная ноччу складзе +9... 16°С, максімальная тэмпература ўдзень +16... 23°С.