У Беларусі знайшлі кішэчную палачку ў расейскіх сырках і эскімо

• 20.06.2019, 12:09

Небяспечныя малочныя прадукты знайшлі ў Лідзе і Наваградку.

У Лідзе і Наваградку выявілі расейскія малочныя прадукты з кішэчнай палачкай. Пра гэта БелТА паведаміла галоўны дзяржаўны інспектар аддзела дзяржаўнага нагляду горада Ліда Гарадзенскай абласной інспекцыі Дзяржстандарту Ірына Квочкіна.

Гаворка ідзе пра глазураваныя сыркі з заменнікам малочнага тлушчу і марозіва эскімо з заменнікам малочнага тлушчу.

Продаж гэтых сыркоў і марожанага забароненая. Акрамя таго, спецыялісты забаранілі пастаўкі гэтай прадукцыі ў Беларусь, а таксама спынілі і дзеянне дэкларацыі аб адпаведнасці на тэрыторыі краіны.

Са слоў Квочкінай, сыркі, зробленыя з натуральнага тварагу і малака, пры належных умовах захоўваюцца да 15 дзён, марозіва - шэсць месяцаў. "Калі на ўпакоўцы пазначана, што тэрміны захоўвання вышэйшыя, можна меркаваць, што ў склад уваходзяць кансерванты і іншыя кампаненты, якія падаўжаюць тэрмін прыдатнасці. Таму варта ўважліва чытаць і аналізаваць інфармацыю пра склад прадуктаў", - дадала спецыялістка.