Клімкіна плануюць прызначыць амбасадарам Украіны ў ЗША
- 14.06.2019, 20:14
Раней Клімкін паўторна папрасіў народных дэпутатаў звольніць яго з пасады кіраўніка МЗС Украіны.
Пасля сыходу з пасады міністра замежных спраў Украіны Павел Клімкін стане украінскім амбасадарам у ЗША. Пра гэта са спасылкай на крыніцу ў дыпламатычных колах паведамляе 14 чэрвеня УНН.
«Ён паедзе амбасадарам у Злучаныя Штаты. Гэта адбудзецца ў найбліжэйшы час, вядома, калі будуць вырашаны ўсе фармальнасці», - сказаў суразмоўца агенцтва.
Цяпер амбасадарам Украіны ў ЗША з'яўляецца Валерый Чалы.
30 траўня прэзідэнт Украіны Уладзімір Зяленскі ўнёс у Вярхоўную Раду прапанову аб звальненні Клімкіна. 31 траўня міністр заклікаў народных дэпутатаў падтрымаць яго адстаўку.
5 чэрвеня кіраўнік дзяржавы заявіў, што прапаноўваў Клімкіну працягваць працаваць, але той вырашыў «сысці ў палітыку».
Камітэт Вярхоўнай Рады ў замежных справах на пасяджэнні 5 чэрвеня падтрымаў праект пастановы аб адстаўцы Клімкіна з пасады міністра замежных спраў.
6 чэрвеня Рада не падтрымала адстаўку Клімкіна.
11 чэрвеня стала вядома, што Зяленскі падпісаў новае прадстаўленне аб звальненні Клімкіна і ўнёс у Раду прапанову прызначыць кіраўніком МЗС Украіны Вадзіма Прыстайко, які 22 траўня быў прызначаны намеснікам кіраўніка Адміністрацыі прэзідэнта Украіны.
Клімкін паўторна папрасіў народных дэпутатаў звольніць яго з пасады кіраўніка МЗС.