У Нью-Ёрку гелікаптэр урэзаўся ў будынак

• 10.06.2019, 21:46

Здарэнне адбылося непадалёк ад Таймс-сквер.

Гэта адбылося на сёмай авеню, паведамляе Reuters са спасылкай на пажарных. Катастрофа адбылася ў дажджлівае надвор'е.

У Twitter пажарнай службы горада паведамляецца пра «аварыйную пасадку гелікаптэра». На месца катастрофы ўжо прыбылі пажарныя, паведамляе РБК.

Месца катастрофы размешчанае на поўдзень ад Цэнтральнага парку, у некалькіх хвілінах хады ад Таймс-сквер.

Пасля катастрофы гелікаптэр загарэўся, паведамляе CNBC. Паводле звестак тэлеканалу, у гэтым будынку размешчаны офісы банкаўскай групы BNP Paribas, Citibank і юрыдычнай кампаніі Willkie Farr&Gallagher. Людзей эвакуююць з будынка.

Тэлеканал таксама размясціў допіс мясцовага жыхара Ленсу Кунс з відэа з месца здарэння. На кадрах бачна, што з даху вышыннага будынка ідзе густы дым. «Быў гучны гук, як ад гелікаптэра, што пралятаў занадта нізка, я паглядзеў уверх і ўбачыў полымя на даху, а потым дым», - напісаў ён.

Аб тым, што адбылося пазней паінфармавала і нью-ёркская паліцыя ў Twitter: паводле яе звестак, гелікаптэр здзейсніў жорсткую пасадку, агонь патушаны.