Як даўней у Беларусі жонак выбіралі
- 27.05.2019, 21:37
Танцы былі неад'емнай часткай жыцця беларусаў.
Калі хлопцу падабаецца дзяўчына, трэба яе запрасіць на танец. Калі з ёй танцуецца так сабе, адчуваецца няўтульнасць, то лепш з ёю не быць. Са сваёй жонкай, з якой танцаваў выдатна, дзед гераіні праграмы «Мова нанова» Анастасіі Кухарэнкі пражыў усё жыццё душа ў душу. Ёсць народная прымаўка: «Выбірай жанчыну, якая ўмее танцаваць, а гараваць і працаваць - жыццё навучыць».
Танец для Насты - гэта яе жыццё. Яшчэ ў школе яна пачала займацца народнымі танцамі. Захапленне не прайшло ў студэнцкія гады падчас навучання ў Лінгвістычным універсітэце, піша «Белсат».
Дзяўчына працягвала танчыць, а пазней у яе нарадзілася ідэя фестывалю Любанскага раёна «Piatrovica», які ў наступным годзе пройдзе ўжо 9-ым разам. Гэта рэгіянальны фестываль традыцыйнай беларускай культуры. Фестываль прывязаны да свята Пятрок, які ў роднай вёсцы Анастасіі Шыпілавічы святкуюць на працягу пяці дзён.
«Беларуская мова - гэта я, гэта мая натуральнасць», - кажа Наста.
Народныя танцы не толькі паглыбілі яе любоў да роднай мовы і культуры, але і прынеслі лёсавызначальную сустрэчу.
На танцах яна сустрэла Васіля, з якім было вельмі зручна танцаваць, ён вёў у пары. Дзяўчына прыгадала параду дзядулі з Любаншчыны і выкарыстоўвала яе пры выбары мужчыны.
Як склалася асабістае жыццё Анастасіі? Ці здзейснілася прымаўка? Глядзіце ў відэа.