«Гэта ўвогуле не нафта»: Еўропа адмовілася плаціць за нафту з «Дружбы»
- 21.05.2019, 18:04
Еўрапейскія нафтавыя кампаніі Eni і Total адмовіліся плаціць за няякасную расейскую нафту.
Пра гэта распавялі Reuters дасведчаныя крыніцы.
«Чаму нехта павінен за яе плаціць? Строга кажучы, гэта наогул не нафта», - заявіў адзін з іх.
Гаворка ідзе пра нафту маркі Urals з высокім утрыманнем хларыдаў, якая пастаўлялася ў Еўропу па нафтаправодзе «Дружба».
У канцы красавіка эксплуататар «Дружбы» ў Беларусі прыпыніў транзіт па адной з галінак трубаправода праз адмову польскага эксплуататара прымаць няякасную нафту, а таксама праз боязь прамысловых аварый у беларускай лагістычнай сістэме і на мясцовых НПЗ.
Са слоў суразмоўцаў Reuters, нафту належнай якасці, якая паступіла па «Дружбе» непасрэдна перад пагаршэннем якасці, Eni і Total ужо аплацілі, а аплата нафты з хлорарганікай павінна была адбыцца 15 траўня, але не адбылася.
Eni і Total паведамілі сваім пастаўшчыкам аб жаданні ацаніць сваю шкоду і зразумець, на якія кампенсацыі могуць разлічваць, калі і ад каго. Акрамя таго, нафтавікі выказалі гатоўнасць плаціць за чыстую нафту пасля аднаўлення паставак па «Дружбе».