«Укртранснафта» прыпыніла транзіт па нафтаправодзе «Дружба»
- 20.05.2019, 18:12
Кіеў адновіць транзіт па «Дружбе» пасля пацвярджэння гатоўнасці вугорскага боку, які паведаміў пра тэхнічныя праблемы.
Аператар сістэмы магістральных нафтаправодаў Украіны «Укртранснафта» прыпыніў прапампоўку нафты па трубаправодзе «Дружба» ў напрамку краін Еўразвязу. Гэта звязана з неабходнасцю правядзення дадатковых тэхналагічных аперацый па замяшчэнню нафты ў трубаправодах, паведамляе «Укртранснафта» на сваёй старонцы ў Facebook у панядзелак, 20 траўня, паведамляе DW.
«Укртранснафта» атрымала ад вугорскай кампаніі MOL паведамленне пра тэхнічныя праблемы на іх баку, гаворыцца далей ў паведамленні. Аператар абяцае аднавіць транзіт па трубаправодзе «Дружба» пасля пацвярджэння гатоўнасці вугорскага боку прымаць нафту.
«Укртранснафта» тлумачыць, што аднавіла транзіт расейскай нафты еўрапейскім спажыўцам 20 траўня а 00.00 гадзін у адпаведнасці з узгодненым аператарамі «Дружбы» графікам і прапампавала ў напрамку ЕЗ 4 тысячы тон нафты.
Праблема з забруджваннем нафты ў нафтаправодзе «Дружба»
У канцы красавіка Расея сутыкнулася з перабоямі ў экспарце па нафтаправодзе «Дружба» праз забруджванне нафты. Беларусь прыпыніла экспарт светлых нафтапрадуктаў (бензіну і дызельнага паліва) ва Украіну, Польшчу і краіны Балтыі праз рэзкае зніжэнне якасці расейскай нафты, якая паступае на нафтаперапрацоўчыя заводы краіны. На Мазырскім НПЗ няякасная нафта прывяла да паломкі дарагога абсталявання.
Расейскую нафту перасталі прымаць таксама ў балтыйскім порце Усць-Луга. Там пакупнікі адмовіліся ад адгрузкі партыі маркі Urals праз сур'ёзнае перавышэнне нормаў утрымання ў сыравіне арганічнага хлору. Раней расейская кампанія «Транснафта» правяла расследаванне і высветліла, што крыніца забруджвання сыравіны, якая паступае на беларускія НПЗ, знаходзіцца на ўчастку нафтаправода Самара - Унеча.
11 траўня «Укртранснафта» заявіла аб аднаўленні транзіту па нафтаправодзе «Дружба», патлумачыўшы, што спецыялісты вугорскай кампаніі MOL правялі дадатковыя даследаванні нафты, якая знаходзіцца ў трубаправодзе, і пацвердзілі гатоўнасць яе прымаць. 17 траўня аператар часова прыпыніў транзіт нафты, спаслаўшыся на неабходнасць падрыхтоўчых работ з еўрапейскага боку, і абяцаў аднавіць перапампоўванне 20 траўня.