На шэсце супраць АКБ у Берасці выйшла больш за 300 чалавек

• 19.05.2019, 13:13

Пратэстоўцы прайшлі цэнтрам горада.

У Берасці на традыцыйную нядзельную акцыю супраць акумулятарнага завода выйшла больш за 300 чалавек, паведамляе карэспандэнт Charter97.org з Берасця.

Паводле звестак праваабаронцы Уладзіміра Вялічкіна, спачатку пакарміць галубоў на плошчу выйшлі блізу 200 чалавек. Людзі абмяркоўвалі прыпыненне фуры пад Кобрынам, адстаўку намесніцы міністра прыроды Іі Малкінай і працу завода АКБ. Паводле афіцыйнай інфармацыі, на прадпрыемстве ідзе працэс пусканаладкі, але актывісты сцвярджаюць, што гэта паўнавартасная вытворчасць, якая ўжо цяпер забруджвае асяроддзе, паведамляе «Брестская газета».

Потым колькасць людзей на плошчы стала павялічвацца.

«Усё, што мы знайшлі ў дакументах яшчэ да таго, як завод пабудавалі, уся гэтая гадасць ужо палезла з усіх шчылін» - сказаў адзін з лідараў ініцыятыўнай групы ў барацьбе з заводам Дзмітрый Бекалюк.

Акцыя на плошчы Леніна перарасла ў шэсце па цэнтры горада.

Блізу 12.40 большасць з тых, хто сабраўся на плошчы, прайшлі вуліцай Пушкінскай, а затым Савецкай да ЦУМа.